Why there is Low platelets count in dengue fever and how you should manage this in 2021?

 

Dengue Fever me low platelets counts ka do main reason hai| First, Virus ka hamaari Bone Marrow ko nayi Platelets banaane se rokna aur second, jo pehle se bane hue hain unko damage kartaa hai| Isi wajah se dengue fever ke patients me low platelets count ki problem ho jaati hai| Lekin, kya aap ye jaante hain ki low platelets count hona sirf dengue fever ke patients me hi nahi dekhaa jaata hai|

Dengue Fever ke Low platelets wale patients or relatives?

Dengue Fever ke season me Low Platelet Count ke baare me aapne bahut sunaa hoga| Hospital ke baaher relatives ke beech me yahi charcha ka vishay hotaa hai ki uske mareej ki platelet kitni badhi hai yaa ghat gayi hai|

Uske baad sab log ek dusre ko apne patient ka experience bataate hain| Ek anajana sa competition shuru ho jaata hai risthedaaro ke beech me apne-apne mareej ki platelet count ko badhaane ka|

Jab unme se kisi ek mareej ko, kisi medical reason ki wajah se platelet chadhaane ki jarurat padti hai aur uske baad agar uski platelet badh jaati hai to dusra relative bhi baar-baar jaaker doctor se request kartaa hai ki uske mareej ko bhi platelet chadhaa dijiye|

Is situation ka ek reason baar-baar media me dengue ko bahut badi tragedy ke roop me dikhaana bhi hotaa hai|

Ho saktaa hai ki iss blog ko padhne waale bahut se log is tarah ki situation se kabhi na kabhi gujre bhi honge|

Lekin kyaa aapko really mein lagtaa hai ki sabhi dengue fever ke mareejon mein Low  platelets count hone par  platelet chadhaane ki jarurat padti hai| Kahin aisa to nahi ki platelets transfuse karne ki hi jarurat na ho|

Must Read: Dengue Fever: lakshan, diagnosis, treatment, vaccine

Iss blog mein hum kuchh  questions ko answer karne ki kaushish karenge:

-Dengue fever ke patients mein platelet count low kyon ho jaata hai ?

-Kya low platelets count waale sabhi dengue fever ke mareejon ko platelet chadhaane ki jarurat hoti hai?

-Kya dengue fever ke mareejon ko without platelets ke bhi theek kiyaa jaa saktaa hai?

-Kya dengue ke patients me platelets transfuse karne se koi faayda hai bhi ya nahi?

-Kya low platelets count ki problem ko ghar par bhi manage kiyaa jaa saktaa hai?

Kyonki Dengue Fever ke poore dramaa mein platelets kahaa se aa jaati hai? Platelet se jude sabhi sawaalon ke jawaab answer karne se pehle humko thoda sa in platelets ke baare me knowledge hona chaahiye|

Aaap kya bolte ho ?

Knowledge honi chaahiye yaa nahi?

To aaiye jaante hai|

What are the Platelets?

Hamaare blood ke two parts hote hain: ek liquid part jisko hum plasma bolte hain aur dusra part hota hai blood cells ka| Ye saare blood cells hamaare liquid plasma me sweem karte rehte hain|

Blood cells ki baat karein to hamaare khoon me three type ke cells hote hai|

1. Red Blood Cells- jo shareer mein hemoglobin ki help se har hisse tak oxygen pahunchaata hai|
2. White Blood Cell- Ye hamaare shareer ka immunity system ko dekhte hain| jab bhi koi infection body me jaati hai, tab yahi WBC aage aate hain|
3. Platelet: Jab bhi kahin par chot lagne se bleeding hoti hai to bleeding ko rokne ke liye platelets aapas mein club ho jaati hai aur blood behnaa ruk jaata hai| Yahi kaaran hai ki platelets ko Thrombocytes bhi kahaa jaata hai|

Agar aapke blood me platelets normal number me nahi honge to bleeding ruk nahi paayegi | lekin kisko kitne platelet counts par dikkat hogi, yah baat person to person vary karti hai|

What is normal life of platelets?

Platelets lagbhag 10 days tak zinda rehti hai | Bone marrow se platelet bante rehte hai, lekin agar bane hue platelets damage ho jaaye to platelets ki sankhya kam ho jaati hai| Kuch conditions me bone marrow se hi platelet ya to kam bante hain ya bahut jyaada bante hain|

What are the causes of low platelets Counts?

Pregnancy ki situation me platelets ki sankhya thodi kam ho jaati hai, lekin yah normal hai aur iske liye kuch karne ki jarurat nahi hai agar koi aur infection nahi hai to|

Kuch medicines ke prabhav se bhi platelets ki sankhya kam ho sakti hai| Jaise ki seizure ki dawaai (daure aana)

Blood ke kuch cancer me bhi platelet kam ho jaati hai| Isko Thrombocytopenia kehte hain|

How much platelets count is normal?

Jab platelets ka count check karna hota hai to doctor complete blood count test karwaate hain| Is test me platlets ki normal range 1 ml blood me 150000 se 450000(saadhe char lakh) tak normal hoti hai|

Agar report me platelets ki sankhya kam ya jyaada hoti ha, tab aapka doctor jarurat ke hisab se aur test karwa sakte hai|

What are the symptoms of Low Platelets Count?

Kyonki platelet khoon ke thakke banakar khoon ko behne se rokta hai, isliye agar platelets ke counts low ho jaayenge to lakshan bleeding kehi aate hai|

Platelets ki sankhya ke anusaar lakshan aate hai|

-Skin pe neel padnaa

-Naak, gums se bleed hona

-Jakhm se khoon der tak behnaa

-Menses me bleeding jyaada hona, potty or peshab ke raaste khoon aanaa jaise lakshan aate hain|

-Kuch logo me brain ke ander bhi bleeding ho jaati hai jab platelets ke counts low ho jaate hai|

Dengue Fever me bhi jab platelets count low ho jaate hain to yahi sab lakshan aate hain|

Chaliye ab hum aapko real question ka jawaab samjhaate hain| Kyonki aapko platelet ke baare me basic knowledge ho gayi hai, isliye ab aapke liye samjhanaa aasaan hoga|

so….lets go guys on a knowledge full small trip with www.healthkibaat.com

Why Platelets Count Goes Low in Dengue Fever?

Jaise hi dengue virus se infected mosquitoes kisi ko bite karta hai to virus khoon me chalaa jaata hai| Blood me jaate hi virus replicate kartaa hai aur apne jaise bahut se virus banaata hai|

Haal-filhaal tak  ya maana jaata tha ki dengue virus hmaare shareer ke kuch khas cells ko hijack karke unko aur jyaada virus banaane ke liye majboor kar detaa hai|

Lekin ab bahut saari research se kuchh secrets pataa chale hai|ashpublication.org ne ek article me “Dengue virus pirates platelets” bahut hi detail se is concept ko samjhaaya hai|  Dengue Fever me platelets kam hone ke kaaran:

1.Blood me enetry milte hi virus sabse pehle platelets ko hi pakadataa hai aur platelets ko infect kartaa hai, ye platelets baaki normal platelates ko infect karti hai|

Ab tak immune system bhi activate ho jaata hai aur immune soldiers nikal padte hai virus ko kill karne ke liye|

Kyonki platelets se virus chipka hai to immune system hamaari apni platelets ko bhi khatm karnaa shuru kar detaa hai|

But virus yahi par nahi ruktaa hai|

2.Dengue virus hamaari Bone marrow par bhi haavi ho jaata hai aur bone marrow se nikalane waale baby platelet ko baaher nikalanaa band kar detaa hai|

Is tarah se hamaare blood me platelets counts low ho jaate hai|

3.Platelet blood me Non-structural Protein banaane lag jaata hai aur virus ke load ko badhaane me madad kartaa hai|

Hamaara immune system isi NS-1 protein ke against bahut antibody banaati hai aur platelet ko marna shuru kar deta hai |

Kehne ka matlab yah hai ki dengue fever me platelets chaaro taraf se ghir jaati hai|

aapko NS-1 Antigen test to yaad hoga, usme yahi NS-1protein check kiyaa jata hai|

Dengue Tests ke baare me jyaada jaaniye:Dengue Fever के लक्षण, डायग्नोसिस, इलाज, बचाव | Dengue fever symptoms, diagnosis, treatment, prevention, home based care

Kyonki shareer ki small blood pipes me leakage shuru ho jaati hai aur sath me platelet bhi kam ho jaati hai|

Jiski wajah se mareej ko har jagah se bleeding ke chance badh jaate hain|

Agar platelets ke counts bilkul low ho jaaye to BP kam ho jaana, mareej ke bheetri organs me bleeding or shock me jaa saktaa hai|

When Platelets counts start going low?

Virus ke attack ke baad platelet activated ho jaati hai aur 4th day ke aas-pas platelets ke counts me sharp decline hone lagtaa hai|

Viral replication ka samay paanch se saat din tak hi rehtaa hai, tabtak immune system control lena shuru kar deta hai|

Uske baad 8th or 9th day par platelets counts up jana shuru kar dete hai|

Platelets ke count ki monitoring ke liye har 24 ghante me platelet counts check kiye jaate hai|

Kya low platelets count waale sabhi dengue fever ke mareejon ko platelet chadhaane ki jarurat hoti hai?

Iska straight forward answer hai

“BIG NO”

Dengue Fever me agar platelet count low hone baad jaruri nahi hai ki platelet transfuse kiyaa hi jaaye|

Agar dengue me platelets chadhaane ka sabse important criteria ki baat karein to Platelet counts low hone ke saath-saath bleeding hona|

Dengue ke almost one third patients me halki-fulki bleeding hoti hai- jaise ki skin par petechie bananaa, gums se bleed hona etc.|

Lekin iska matlab ye nahi ki sabhi me platelets transfuse kiye jaaye|

Aise bahut saare cases hai jo bees hazaar se platelets kam hone ke baad bhi survive kiye hai |

Aur aise bhi bahut cases hote hai jinko 50 thousand se above platelet count hone ke baawjood bhi platelet transfuse karne padte hain agar bleeding ka doubt hota hai ya patient aisi disease se affected hai jisme bleeding hone ke chance jyaada ho|

WHO ne to 2009 me hi platelets transfusion ke against recommendation de di thi aur kahaa tha ki platelet transfusion se dengue patients ko koi benefit nahi hotaa hai|

Lekin koi pukhta reseach nahi hui thi iss baare me|

Bahut saare researcher se milke ek research ki jiska naam tha ADEPT study jisme unhone 372 dengue positive mareejo par research ki|

Isme paaya ki 5% se bhi kam dengue mareejon ko platelet chadhaane ki jarurat samjhi gayi|

Aisa dekha gaya ki 80 se 90% mareejon me platelet 1 lac se neeche gayi aur baad me normal ho gayi|

Aur 10 se 20% patients me platelet 20000 se neeche gayi jinko isliye platelet di gayi taaki internal bleeding naa ho|

Uske baad or bhi kai research ki gayi aur paya gaya ki platelet diye gaye mareejo ke mukaable bina platelet diye gaye patients me survival ke hiaasb se  jyaada fark nahi hai|

Matlab platelets transfuse karne se koi extra life nahi bach paayi|

Balki iske opposite jinme platelet di gayi unme fluid overload ka khatra dekhaa gaya|

Kya dengue ke patients me platelets transfuse karne se koi faayda hai bhi ya nahi?

India ki national vector borne disease control programme ki guidelines me saaf kiyaa gaya hai ki platelets count 20000 se low waale patients, jinme bleeding nahi ho rahi hai,  me bhi platelets dene ka patient me final outcome par koi faayda nahi paaya gaya|

In guidelines me is baat ko bhi bahut hi straight forward kahaa hai ki platelet count kam hone ke baad patient me internal bleeding ke darr se platelet dene ka koi faayada nahi hai|

Corona pandemic ko dhyan me rakhte hue in guidelines me un patients ki management ke baare me bhi nirdesh diye hai jinme dengue aur corona ek saath ho gaya hai|

CDC, Atlanta ki guidelines me bhi platelet transfuse karne ke liye strict manaa kiya hai|

Platelet ki bajaaye mareejon ko whole blood ya sirf RBC chadhaane aur hydration maintain karne tatha baaki supportive care par zor diyaa gaya hai|

Isliye agar mareej ke platelet counts low ho rahe hai aur aapke doctor ko platelet dene ki jarurat nahi lagti hai to please apne doctor par pressure mat banaaiye platelets transfuse karne ke liye|

Kya dengue fever ke mareejon ko without platelets ke bhi theek kiyaa jaa saktaa hai?

Ab tak aapko is baat ka ahsaasto pakka ho hi gaya hoga ki sabhi dengue mareej ko platelet dene ki jarurat nahi hai|

Aur platelets counts  kam hone ke sath-sath bleeding bhi ho rahi hai tab bhi doctor ko decide karne denaa chaahiye ki platelet deni hai ya RBC ya whole blood denaa hai|

Ab simple se number batataa hun shayad aapko baat samjh aaye|

dengue fever : mortality 1% hoti hai |

Dengue hemorrhagic fever with timely treatment:2-5% mortrality

Dengue hemorrhagic fever without treatment: 50% mortality

Yaani ki dengue me platelet se jyaada important hai ki patient ko sahi time par supportive care mile aur uske liye mareej ke ander severe dengue ke warning signs ko pehchaana bahut jaruri hotaa hai khaskar un patients me jinme pehle kabhi dengue hua hai, pregnancy, koi lambi bimaari etc. |

Sabse crucial samay hota hai bukhaar utarane ke 24 se 48 ghante ka jis samay warning signs ko ignore nahi karnaa chaahiye|

What are the home based management of Low Platelet counts in dengue fever?

Platelets apne aap hi 8th-9th day par badhna shuru ho jaati hai| Yah poori tarah natural hai aur iske liye kuch special karne ki jarurat nahi hai|

Na hi to steroid ka isme koi role hai, na hi kisi antibiotic ka role hai, na hi koi injection ya tablet hai jo platelets ke count ko badha sake|

Papaya Leaves par kuchh research hui hai joplatelets ke counts ko badhaane ki baat karti hai, haalaki ki pakke taur pr kehne ke liye badi research ki jarurat hai|

Sabse jaruri hai ki mareej aaram kare, bukhaar ke liye paracetamol ke alaawa koi aur dawaai na de, hydration maintain rakhe|

ORS ka solution bahut achcha hai| Iske alaawa nimboo pani, Coconut water bhi bahut helpful hota hai|

Kyonki inme bahut saare mineral aur paani ki maatra hoti hai|

Kehne ka matlab sirf itnaa hai ki jyaada se jyaada liquid diet deni chaahiye|

Agar aap gharelu kadha le rahe hain to moderation me le, bahut jayaada aur bahut gram aapko nuksaan kar saktaa hai|

Diet ka khas dhyan rakhein jisme fruits, vegetables kaafi helpful hoti hai| Kyonki inme antioxidants aur vitamins hote hain|

Kaushish kijiye ki aapke khaane me calcium (milk and milk product), vitaminA, Iron, vitamin b9, Vitamin B12  bharpoor hone chaahiye|

Umeed karte hain ki aapko ye jaankaari pasand aayi hogi aur aap apne sathiyon se share karne ke baare  me vichaar karenge|

Disclaimer: Ye blog sirf aur sirf educate karne ke liye likha gaya hai, kripya ise kisi tarah ka koi treatment ya prescription na samjhe|

Kisi bhi tarah ki koi pareshaani hone par ek qualified doctor ke paas jaakr salaah le aur unke salaah ko achche se follow bhi kare|

www.healthkibaat.com team aapke aur aapke parivaar ke achchhe sawasthya ki kaamna karte hain|

Dhanyvaad